2009 წლიდან, „აღმოსავლეთ პარტნიორობის“ ინიციატივის ამოქმედების შემდეგ ხანგრძლივი გზა გაიარა ევროკავშირსა და მის პარტნიორ ქვეყნებს შორის ორმხრივი და მრავალმხრივი თანამშრომლობის დღის წესრიგის ჩამოყალიბების კუთხით. 2014 წელს, საქართველომ, უკრაინამ და მოლდოვამ ასოცირების შესახებ შეთანხმების ხელმოწერით კიდევ ერთხელ დაადასტურეს თავიანთი ევროპული არჩევანი და ევროკავშირში გაწევრიანების სურვილი. ამ შეთანხმებებით მხარეებს შორის ორმხრივი თანამშრომლობა ახალ ეტაპზე გადავიდა. ასოცირებულმა პარტნიორებმა მნიშვნელოვან პროგრესს მიაღწიეს ასოცირების შესახებ შეთანხმებების და მათი შემადგენელი კომპონენტის „ღრმა და ყოვლისმომცველი თავისუფალი სავაჭრო სივრცისა“ და ვიზა-ლიბერალიზაციის სამოქმედო გეგმების პოლიტიკური და ეკონომიკური ნაწილის განხორციელების მხრივ. „აღმოსავლეთ პარტნიორობის“ ქვეყნების განსხვავებულმა ამბიციებმა და ინტერესებმა ევროკავშირთან თანამშრომლობის თვალსაზრისით ევროკავშირის სამეზობლო პოლიტიკის გადახედვის საჭიროება გამოიწვია. „აღმოსავლეთ პარტნიორობის“ ინიციატივის ერთიანობის შენარჩუნება განსაკუთრებით მრავალმხრივ ფორმატში, ევროკავშირისა და მისი პარტნიორი ქვეყნების ერთ-ერთ პრიორიტეტად რჩება.