ევროკავშირი იყო ერთ-ერთ პირველი, რომელმაც საქართველოს აღმოუჩინა დახმარება გარდამავალი პერიოდის ადრეულ რთულ წლებში. მას შემდეგ ევროკავშირი ყოველწლიურად მნიშვნელოვან ფინანსურ დახმარებას უწევს საქართველოს დემოკრატიული განვითარების მხარდასაჭერად. 2014 წელს, ასოცირების შესახებ შეთანხმების ხელმოწერით, საქართველო-ევროკავშირის ურთიერთობები გადავიდა თვისობრივად ახალ და უფრო მაღალ საფეხურზე. ევროინტეგრაცია გახდა ქვეყნის საშინაო პოლიტიკის განუყოფელი ნაწილი, რაც აყალიბებს საქართველოს „ევროპული გზის“ მტკიცე საფუძველს. სწორედ ამ თვალსაზრისით, ევროკავშირის დახმარებას მნიშვნელოვანი როლი აკისრია ასოცირების შეთანხმების შესრულებისა და მასთან დაკავშირებული რეფორმების განხორციელების პროცესში. წარმატებით გატარებული რეფორმების ფონზე, ევროკავშირის, მისი წევრი სახელმწიფოებისა და სხვა დონორი ორგანიზაციების მიერ გაწეული ფინანსური მხარდაჭერა საგრძნობლად გაიზარდა. ამავდროულად, საქართველოსთვის ხელმისაწვდომი გახდა ევროკავშირის დახმარების ახალი და მრავლისმომცველი ინსტრუმენტები.